高登巴打呢期日日開po話:「見到依家樂壇咁，突然好掛住林峯…」「林峯」喺呢句句子入面，可以秒改為「黃宗澤」或「徐子珊」。Any肥，林峯，真係miss you so much。
次次林峯現身都局住要回應千語BB，噚日唔使。佢是日一身便服兼戴住口罩，同助手現身中環，佢先去咗砵甸乍街一間上樓嘅骨科診所睇醫生，大約逗留咗40分鐘左右先落樓，問佢係咪整親？佢話：「唔係，只不過係定期check吓。」
跟住峯峯又去咗銀行處理一啲嘢，之後去咗salon剪頭髮，一口氣處理晒所有跠嘢，忙得過馬路嗰陣都係咁篤手機。不過沿途冇乜人認得佢，難怪佢可以雙手插袋、行得輕輕鬆鬆——之前大台賜咗多個「亞太區」最受歡迎男歌手，俾網民解讀成「亞皆老街至太子道西」為之亞太區，依家林峯北上都吃得開，只係可能佢嘅fans唔喺中環區啩…