學民思潮召集人黃之鋒、學聯秘書長羅冠聰、立法會議員陳偉業同社民連副主席黃浩銘，舊年6月喺中聯辦門外抗議時焚燒白皮書，一年之後俾人告阻差辦公，單案下周一喺東區法院再提訊，到時4人都會申請終止聆訊。
今次邊個代表佢哋提出申請？原來係七警都想聘用嘅資深大狀駱應淦（圖）。之鋒又搵佢，咁佢即係幫邊邊先？口痕友叫啲人咪咁無知，舊年駱伯都代表過民建聯黨員、粗口大狀馬國恩，當時馬因為用英文粗口鬧長毛而面對大律師公會紀律聆訊，so what？駱伯係專業嘅，更何況打官司係講證據。
今次駱伯拍住大律師石書銘，咁蹺3年前駱伯拍佢，又係啲社運case，嗰次駱伯直頭免費幫被控襲警個𡃁仔求情。據了解，今次駱伯係收象徵式費用。