昨日談及美國聖母大學排名甚高，在USA Today的Best Colleges for 2016（undergraduate study）排名第九，大中華地區學生申請入學時，同時申請25萬美元的獎學金，共有5位幸運兒可分享，此獎學金由2011-2015年由李嘉誠基金會捐出，明年2016開始，改由周凱旋基金會捐贈。
左丁山問老友：「申請獎學金係唔係好難？」老友話：「要成績好好，近乎狀元級數學生先至攞到呢項獎學金㗎，聖母大學好感激李嘉誠基金會與周凱旋基金會，為咗培養大中華地區優秀學子，慷慨捐贈。照我所知，過去攞到呢項獎學金嘅，考SAT攞到1560分，入到聖母大學之後，GPA平均高達3.9，全部係高質素優才生。」嘩，咁厲害，香港考DSE啲近乎狀元級人馬可以試吓申請，聖母畢竟係美國本科大學之第九名（第一耶魯，第五哈佛，第十達茅夫），尖子入讀，絕對名實相符，香港最著名一位校友當然就係前中文大學校董會主席鄭維健醫生。
老友順便通知埋，聖母大學由10月22日至25日，在香港舉行一個Global Forum: Asia，前日晚上有升學講座，昨晚在銀行家會所有周凱旋基金會大中華獎學金頒佈會，今日重頭戲有主題演講午餐會，於快活谷馬場馬主廂房舉行（十一點至兩點），請得DHL創辦人、大慈善家／企業家鍾普洋演講，題目係Ethical Leadership and the Cultural Divide between Manufacturing and Service，鍾普洋講過，人生過咗60歲就進入第三階段（第一階段0至30歲學習，第二階段30-60歲，爭取事業成功，搵錢），要回饋社會，將過往60年得到嘅學科經驗與實踐傳予新一輩，故此近年除咗鍾情藝術之外，就係熱心於參加義務演講及經驗分享講座，論述通識教育與企業家創業精神之理論與實踐。本港大學改為四年制後，推行通識教育，得到鍾普洋幫助不少。至於後來有人話中文大學之通識教育係受美國人指揮及影響嘅，鍾普洋唯有一笑置之，不與嗰批人爭辯咯。
有位老友亦收到上述之信息，打電話嚟問左丁山講：「喂，我上網查過，根據Times Higher Education之排名，聖母大學全世界排名第108名，低過科大與港大好多噃！」呢呢，盡信書不如無書，左丁山從來都對亞洲大學名列世界頂尖，甚有疑問，QS與Times之排名，其實過份抬舉咗亞洲嘅大學，不必過份着緊。