民主黨主席劉慧卿上周去咗西貢，同青年事務委員會主席劉鳴煒一齊參加全城街馬圖騰跑，卿姐仲學人玩印水紙，走上時代尖端，點知玩出事喇，個印水紙洗唔甩，搞到噚日卿姐一雙玉臂，保留住上個星期嘅痕迹（圖）。
卿姐噚日去立法會開會時着咗件中袖衫，八方見佢左右手前臂都有一個鮮艷公仔圖案。佢好得意咁展示畀八方睇，話係上星期參加圖騰跑時整落，幫佢整嘅人仲話一日左右就會甩色，點知家陣過咗成個星期，圖案仲係揮之不去。
卿姐自嘲好彩個圖案係整落對手度，否則好似其他參加者整喺塊面度，就真係大鑊喇。其實若然卿姐想洗甩個圖案，不妨試吓用酒精或者牙膏，可能更有效。