這晚快活谷夜馬，雖然是於周四而非慣常的周三舉行，但在C加3跑道上，內檔馬依然惡晒，繼頭兩場由一對二檔馬「有情風」、「馬狀元」包辦孖寶後，到了第三場四班1200米，更加一至三檔齊開。
第三場勝出的是一檔大熱門「騰煌」，此於雷神胯下守好位，末段彈甩對手三身位收韁而勝，無驚無險連捷。查投注人士對「騰煌」幾近瘋狂，臨尾不斷落飛，單是此駒獨贏投注額竟高達1,613萬，比餘下11駒夾埋仍要多，只得1.6倍，成為今季谷戰暫時最熱頭馬，亦係繼頭場「有情風」後，這晚第二匹季內連捷馬。更甚者，雷神今季累積四次騎何良馬房馬匹全勝，這對無敵組合騎練，堅到你唔信！
今場跑第二係韋達座騎排二檔的「歡喜」，雷神同韋達繼頭場後再度包辦Ｑ，跑第三係潘頓策騎的三檔馬「旅遊一哥」，全場一至三檔馬由三大高手包辦三重彩；跑第四「鑽石巨匠」，呢條由全場最熱四駒構成的四重彩，熱過出爐蛋撻只派847元。