曾經在80至90年代繪畫電影海報的著名畫家崔成安，由電視台佈景設計、電影場景設計及負責人物造型設計，不少都是他的手筆。崔老師在97年毅然離港移居加拿大，直到最近因為偶像李小龍的75歲冥壽，他回歸香港參與活動。崔老師筆下的李小龍栩栩如生，他嘆息現今科技發達，作品變得冇感情：「電腦效果係好完美，但好似少咗啲人味。」
撰文：何慧斯
香港著名畫家崔成安，移居加拿大已經有18年，因為一次無心插柳，獲出版社的邀請，繪畫作品《崔成安．李小龍海報集BRUCE'S ART》，其後他更獲邀為嘉禾電影公司授權出版的《猛龍過江》電影繪本進行繪畫。日前崔老師在柴灣接受專訪，他說：「其實書冊籌備咗一段時間，最初畫嗰陣唔係諗住出畫冊，只係諗住用嚟消閒，點知我喺facebook見到有啲關於李小龍鋪天蓋地嘅周年紀念，香港有好多畫家朋友po咗啲畫上去，有朋友叫我拎其中一張畫嚟比賽，結果好幸運咁中獎，所以咪返嚟攞獎。」
對於今次先後得到嘉禾電影和李小龍的遺孀授權繪畫《猛龍過江》，崔老師說：「佢哋肯畀你做，即係證明你嘅存在價值。」
讚李小龍有品德
提到近年大部份繪圖已被電腦取代，崔成安說：「其實見到都有啲感慨，好似以前一套電影可以畫三張海報，跟住只係要一張，但係都好似唔願意出，剪剪貼貼就算，過咗呢段青黃不接嘅時期，到有電腦嘅出現，咪叫做好番啲。但係變化都好大。自從出咗電腦，全世界都變晒，好多人有咗電腦唔識用筆畫，雖然效果係好完美，但好似少咗啲人味，好多係冇感情。」
當年崔老師擔任過採訪娛樂新聞的攝影記者，一向視李小龍為偶像的他，不諱言在繪畫的過程勾起好多回憶，他說：「當年我由佢嚟香港發展到過咗世都有跟進，我同李小龍相識，對佢有初步了解，佢當年好真，人品同武德真係冇得彈，我有朋友有份拍《龍爭虎鬥》見到佢，好心急喺地下執咗煙包紙畀佢簽名，點知佢見到就掉咗張紙話唔得，之後喺袋拎咗張相送畀我朋友，所以真係無限回憶。」
當年李小龍逝世，崔老師在朋友的幫忙下，獨家拍得李小龍棺木到達殯儀館，他說：「嗰陣我哋分頭搵，不過因為全部都用白布蓋住，只露出雙腿，要揭開白布先知道邊個係李小龍，結果第二隊行家順利完成拍攝，但係最後冇登到啲相。」
