旅發局主辦嘅美酒佳餚巡禮，今年回歸中環，噚晚8點正式對外開放，識飲識食之人排長龍入場，財爺鬍鬚曾（圖）、商務及經濟發展局局長蘇錦樑有出席開幕禮，兩個人喺幾個攤檔品嚐蟹蓋、鵝肝肉餅、威士忌等，嘆吓美酒佳餚，真係過癮。
官到無求膽自大，八方都唔知鬍鬚曾係咪已經好似林鄭司長咁無求，但相信佢酒膽應該幾大，事關入場冇耐，就見到鬍鬚曾面紅紅咯。旅發局主席林建岳好識做，請嘉賓食飯，席間有特別節目，請咗香港青少年管弦樂團一班成員，現場演奏《獅子山下》、《東方之珠》、《男兒當自強》等名曲，據講係岳少親自安排，出錢出力請一班後生仔到場表演。