在劇集《愛回家》中飾演阿登嘅羅天池，雖然上星期離開咗工作14年嘅無綫，但𠵱家冇時間休息，忙於籌備婚禮。天池噚日接受電話訪問時透露同圈外女友多多已經喺兩年前結咗婚，並準備喺11月11日喺尖沙嘴千禧新世界酒店補擺25圍喜酒，及邀請徐榮及姜皓文等做兄弟。天池解釋：「之前拍處境劇較忙，最近先有時間搞結婚啲嘢，聽聞四條1係光棍節，易記嘛，咪當脫離光棍囉。」
檳城驚喜預演婚禮
天池仲揀咗馬來西亞檳城影婚紗相，趁機畀個驚喜太太，佢話：「我唔係一個浪漫嘅人，好踏實，冇求婚就結咗婚，成日俾老婆詐型。所以趁今次影婚紗相，預先同朋友夾定book咗一個場地，但又要扮嘢話係人哋嘅結婚場地，同佢講『快啲啦，唔好阻住人』，趁佢冇預備情況下跪地送花，預演一場婚禮，乜都補番晒。」
問天池可有計劃生BB？佢話：「都有，但要等啲嘢定晒先，啱啱先離開TVB，28號又要返山東拍劇，所以呢幾日忙住搞婚禮啲嘢，又俾畀人（老婆）詐型都冇辦法。」
撰文：馮仁昭