【本報訊】千里尋母的Teresa昨晚離港返美，她感激養父母的栽培，養父早年去世後，她現時與養母同住加以照顧。尋母報導出街後，雖然仍無音訊，但她抱平常心，樂觀面對。「我唔會放棄，無論佢(生母)想唔想同我相認，我都尊重佢決定。」這次尋母之旅未見成果，她仍然有信心，耐心等待，她強調，只求團聚，希望生母不要內疚。
記者：金敏琍 攝影：麥超億、張鼎和、周子惇
7歲離港赴美，匆匆30年，留港的日子，Teresa曾到保良局探院童，「有個小朋友一見我就問，『姐姐你係咪嚟接我走？係咪帶我去街？你係邊個？』同我細個一模一樣」。重回成長地，入口石門依舊，昔日院友各散東西。
保良局，一向予人是冷冰淒涼的孤兒院，但Teresa認為「完全唔覺慘，保良局啲姑娘好好」，早前她與曾照顧她的姑娘聚舊。30年過去，已屆中年的姑娘一見面就認出大叫「阿珊」。
尋根之旅，她最欣喜的是有姑娘送上保存30年的發黃童年照，「呢張相應該係喺保良局影嘅，好彩啲姑娘幫我keep住」。阿珊拿着舊照，講述保良局的日子：每日大伙吃早餐，游水，上課……即使衣服要輪流穿，從沒自己物件，也沒有親人，但回憶仍是溫暖。
她說，那時最期待出街玩，「日日等人(義工)帶我去街，或者同我講一聲我係你親人，但係冇囉。」小女孩更幻想：「佢係咪我媽咪、或者我婆婆？但如果係，點解留低我喺保良局？」負面思想繼續發酵，「我應該無親人，呢一世都要住呢度」，可幸領養父母出現，帶她到美國，改變一生。
如有任何消息請聯絡：
《蘋果日報》熱線：63836568
紅十字會熱線：25077135