王大陸喺電影《我的少女時代》中飾演外冷內熱嘅暖男徐太宇，迷到唔少少女同中女。到底呢位新一代男神，戲外又會點對一位喊緊嘅女生?
動新聞派出動主播阿Gi，做訪問時故意扮被上司責備爆喊，睇吓王大陸即時反應，探究佢到底係咪暖男。現場除咗王大陸身邊一位卧底知道行動之外，其他人全不知情！首先，阿Gi好認真咁同大陸講解訪問內容，之後，其上司就扮惡狂鬧阿Gi：「其實今朝已經吩咐你要早啲返嚟準備好所有嘢，但係你冇囉…」
「被鬧」嘅阿Gi，扮到好委屈同無奈，身邊嘅大陸見到呢啲「撕殺」場面狀甚尷尬，立即借尿遁唔忍心睇落去。阿Gi與上司見到佢入局，當然加多兩錢肉緊交戲。坐定定準備做訪問嘅大陸開始發揮暖男本色話：「不要太難過。」阿Gi呢個時候就借機爆喊，大陸手足無措咁話：「慢慢講 (仲拍阿Gi安撫) 沒事。」並貼心地叫助手遞紙巾畀阿Gi抹眼淚，抵加分啦！
阿Gi開始交戲：「我沒有準備好東西，其實我不想的，對不起......」大陸就話：「沒事，我很好，你等我一下。」之後大陸靈機一觸發揮暖男本色，攞起阿Gi份講稿：「我來當主持人，好，我來問你問題......」阿Gi見到大陸咁認真，卒之忍唔住自爆真相，如夢初醒發覺被玩嘅大陸事後孔明：「你在作弄我嗎？演的很好呢，這個蠻厲害的，演得不錯，不錯你們那邊需要人對不對，我要報名，主持人都很厲害，我有嚇到。」