金沙中國（1928）主席艾德森（Sheldon Adelson），早前點名寸銀娛（027）犯了巨大錯誤，搞到之後要寫信畀銀娛主席呂志和道歉。唔知係咪學精咗，今次佢喺季績電話會議收晒火，仲賣口乖，知道「小賭王」何猷龍旗下新濠博亞嘅新賭場「新濠影滙」下星期開張，仲話想去試坐嗰個8字型摩天輪㖭。
艾德森話，早幾日睇咗新濠影滙嘅設計，至今都諗唔明個摩天輪點樣運作，但就覺得新濠呢個新場應該幾有競爭力。非執董Robert Goldstein補多句，話艾德森搵緊張免費飛去玩。
可能上次艾德森寸得過火得滯，Robert今次幫佢補鑊，話好開心見到澳門有新賭場開張，金沙希望其他對手嘅生意做得更好，咁先會帶多啲生意到澳門，又話佢哋係新濠同銀娛嘅粉絲喎！