今屆區選深水埗麗閣戰況激烈，現任議員民協馮檢基唔單止被工聯會陳穎欣（圖）狙擊，仲被前民協成員黃仲棋挑機。馮、黃兩位大男人，噚日仲隔空開拖。
黃仲棋噚日突然向馮檢基發公開信，指摘對方拒絕所有傳媒安排嘅選舉論壇，強調如果係真正民主派，唔應該逃避辯論，更應藉此表明民主路上嘅立場。
馮檢基冇耐就發聲明反駁，強調有傳媒機構近日邀請麗閣三位參選人出席論壇，但拒絕出席嘅其實係工聯會候選人即係陳穎欣啦，強調自己非常樂意出席所有參選人都落場嘅論壇，對於黃仲棋唔指摘建制派參選人，反過來針對自己，作「失實、無意義」嘅批評，非常詫異。睇嚟陳穎欣嚟緊大可印印腳，剝花生咯。