「Son姐，有事想請教，小弟想進修讀master，希望日後多啲出路。但礙於工作時間、學費問題，都有一定考慮。本來想讀MBA，但係中大、港大part-time course學費好貴，網上見一間美國UMT或者公開大學都有遙距MBA讀，但呢啲course外界認受嗎？最怕讀完冇認受性，浪費時間同錢。但同業前輩都話經驗緊要過學歷，既然我都做咗咁多年，都唔使靠master換入場券。所以想請教你哋專業人士對於公開大學或者UMT之類課程有乜評價？臨老先迷惘，真係唔好意思，失禮晒！」
你居安懂得思危及早為未來籌謀打算，實在難得，何失禮之有？人無遠慮，必有近憂，是事實。你讀MBA是為了增進知識的話，我只能講能學的其實不多，高昂的學費根本不值。不過話分兩頭，你要是負擔得起金錢時間，花錢買多個文憑，當然幾時都可以讀。但你要是以MBA作為投資工具，希望增加他日轉工的本錢及機會，那就大可不必，恐怕你血本無歸！
今時唔同往日，MBA周街都係，正如你自己講五花八門任君選擇，只要你有錢交學費就得，你覺得會幾有認受性？不如我反來問你，你要是僱主，求職者有沒有MBA會不會影響你聘請他的決定？高學歷對初出茅廬的年輕人找某一些類型的工作或者有多少幫助，入職之後誰還在意學歷高低？任你講到天花龍鳳幾天下無敵又如何？紙上談兵得個講字講完做不出任何成績來，嘥氣！正如你的前輩所講，實戰經驗比學歷重要，我完全同意。工作表現得最好夠出色的，就能脫穎而出。
終身學習，精益求精，要讀，就正正經經找一些讀完能夠令你有所提升的科目，目光更遠，知識更廣博，才是你找未來出路的真本錢。
張慧敏
http://www.facebook.com/HKcareerdoctor