如果畀個機會你問特首梁振英一條問題，你會問乜？無政黨黃毓民問咗條可能唔少市民相當有共鳴嘅問題，就係問CY「幾時死？」呢鋪CY冇扯火，反而笑笑口，以毛澤東詩句「牢騷太盛防腸斷」回應，仲祝對方健康長壽，唔通希望對方變壽星公？點知CY未發難，工聯會黃國健就話毓民嘅言論有冒犯喎。
毓民噚日喺特首答問大會上稱受到好多選民嘅壓力，要佢問CY幾時死，CY未嚟得切回應，黃國健就急不及待護航，質疑毓民條問題有冒犯性，要求立法會主席曾鈺成裁決，點知曾鈺成話CY「完全係可以回應」，換言之即係CY要答「幾時死」。
大家以為CY會開拖？點知佢笑笑口大拋毛澤東詩作《和柳亞子先生》一句「牢騷太盛防腸斷」回應，奉勸毓民牢騷太多會影響健康，同時祝佢健康長壽。八方翻查過，呢首詩下一句係「風物長宜放眼量」，即係叫人目光放遠，唔好計較個人名利得失，連前總理溫家寶、國家主席習近平都引用過。
曾鈺成︰不如畀特首回應
黃國健會後依舊滿肚火，對曾鈺成呢個裁決莫名其妙。曾鈺成強調，冇人會覺得「你幾時死」係真問題，但答問大會除咗畀議員質詢，亦可以借機向特首表達意見；與其由佢裁定合唔合規程，不如畀特首回應，市民自然會睇到議員問得好唔好、特首又答得精唔精采，仲點名叫黃國健唔好再「儳亂歌柄」。
李八方
mailto:[email protected]