康泰旅行社創辦人黃士心近期喜事重重，早前榮升大馬拿督。近日佢穿上白色禮服、黑色絨帽，一身拿督服式接受訪問，表示會繼續為馬來西亞旅遊業作出貢獻，又很開心地向記者分享一件事，而呢件事嘅開心程度，拍得住佢加入拿督行列，就係他的乖女、做律師之Connie黃康莉，將於12月12日出嫁，當日婚禮更會邀請財政司司長曾俊華出席。
唔講唔知，黃士心除了係本地旅遊業鉅子，亦係馬場大亨，買吓買吓唔經唔覺，家陣家族有8匹「旅遊」系現役馬，係本港最大馬主之一。而呢批馬中，好多擺喺高伯新馬房，高伯新又點會唔知黃士心嫁女。本周日（25日）高廐有匹「旅遊大使」跑三班1600米，隻馬上次在港初出，即追入第五已試準，唔使講今仗高伯新一定出盡法寶，務求贏馬提早賀黃士心嫁女。