諸葛紫岐與Neway二少薛嘉麟近月傳婚變，冷戰多時，前日二人趁假期帶兒子外出享天倫，薛家麟手上仍戴婚戒。不過，諸葛紫岐昨日一身橙紅裝到中環出席MAX & Co.活動，手上卻不見婚戒，只有食指戴上戒指，同場還有美國名媛兼時尚指標Olivia Palermo、何超盈、王曼喜、王麗嘉等。
諸葛面對鏡頭保持笑容，但明顯消瘦現胸骨，她解釋暴瘦是因工作太忙所致。問是否很久沒有家庭樂？她說：「都係，我哋都忙。」問婚姻狀況？她強顏歡笑謂：「多謝大家關心，作為媽咪都要照顧屋企，希望小朋友喺一個好開心嘅家庭下成長，但𠵱家需要時間。」是否盡力挽救中？諸葛說：「畀啲時間，大家都忙，多謝關心。」可仍深愛對方？諸葛此時想喊，索一索鼻，未及回應已被工作人員推了進會場。
不為婚姻棄事業
冷靜過後，諸葛再接受訪問，被追問婚姻是否涉第三者？她說：「呢個私人問題，唔想講太多。」問題幾時出現？她欲言又止：「都唔知點答。」是否仍有彎轉？諸葛點頭：「係可以坐低傾吓，大家都喺度。」有指諸葛太忙冷落老公，而男方喜愛夜蒲，諸葛說：「每個人都有自己嘅夢想，男女都一樣，我唔會阻佢嘅事業，當然都希望佢支持我嘅事業。」為婚姻放棄事業？她反問：「你會否為夢想放棄？」為小朋友呢？她說：「我好愛我個仔，我會盡一切去愛佢同保護佢，但佢（老公）唔需要我保護，畀啲時間我哋處理啦，係有啲方法可以解決嘅。」
採訪：羅慧敏
攝影：陳志嵐
