香港教育學院下月20日舉行第21屆學位頒授典禮，同場頒授榮譽博士學位畀四位傑出人士，其中一位係演藝界嘅汪明荃（圖），佢獲頒榮譽人文學博士學位。教院讚揚1992年獲選為八和會館首位女主席嘅汪阿姐，係一位矢志傳承粵劇嘅傑出表演藝術家，憑幹勁同毅力，推動公眾再度關注粵劇文化。其實汪阿姐破天荒以粵劇腔演繹時代曲《少女的祈禱》，都算一種文化上嘅crossover。教院同時讚揚現為全國政協委員嘅汪阿姐，積極參與社會服務。
已退休嘅前浸大校長謝志偉亦榜上有名，獲頒榮譽社會科學博士學位，主要讚揚謝校長喺1971至2001年間，帶領浸會書院由私立專上學院，至1983年成為獲政府資助嘅高等學府，再到1994年升呢為大學。