樓市氣氛開始轉差，中小型住宅嘅情況特別明顯，近期幾個新盤銷情亦都放慢，排隊等買樓嘅人數明顯減少，發展商都唔能夠只係話自己個樓盤有幾正、價錢有幾吸引去推銷，而要採用其他方法去吸引買家注意。
會德豐地產旗下有個將軍澳新盤，最近以意大利島嶼Capri命名，發展商仲搵來創作過經典歌曲《友情歲月》嘅作曲人陳光榮，創作樓盤電視廣告嘅背景音樂。陳光榮解釋，由於樓盤近海，所以創作靈感來自大自然，音樂由弦樂與鋼琴進行大合奏，接近自然聲音。
其實樓盤廣告一向都會用到配樂，不過發展商就好少搵知名音樂人作曲，可能發展商唔想搵藝人、名廚、藝術家、模特兒做宣傳咁普通，所以去到搵音樂人，叫做特別啲喇。