咩叫神乎其技，雷神這晚一次過Show晒畀大家睇，第四場佢楔內欄一步不蝕，後上勝出大熱門「過關勇將」已甚精采，到第五場三班一哩，初策沈廐「彪形勇漢」，更是盡顯智慧完美發揮，跑到對面直路見步速偏慢唔對路，佢老哥突然將「彪形勇漢」沿最外叠加速上前，再切入埋欄收慢腳步慢放，帶住成棚馬入直路，就此畀佢早着先鞭放返終點，爆出7.8倍半冷WIN，繼勝出何廐「騰煌」、鄭廐「過關勇將」後，這晚完成帽子戲法，可能雷神亦認為自己演出太出色，感到自豪，「彪形勇漢」過終點時雷神顯得十分激動，不斷高聲狂嗌，非常振奮。
「彪形勇漢」過去5戰全落第，今場本來只是下風馬，可謂贏在雷神，而廐主沈集成保持今季谷戰例牌日行一善有馬贏未斷纜。今場大熱門落喺新勝馬「駿將」身上，此駒限於跑法要靠後追，當中段「彪形勇漢」雷神踩油之際，韋達唔想畀佢走甩，焗住推騎加速抄外叠入彎，又蝕位又嘥力，卒之追唔到「彪形勇漢」，輸個幾馬位做二奶，「駿將」馬主連捷夢碎，不過跑完前五場，韋達四度入Q獲一冠三亞，已經係佢近期代表作。
今場三、四名都係冷門，分別為「盈豐駿駒」及「一見鍾情」，四重彩派四萬二千幾。
「彪形勇漢」馬主劉展灝表示，賽前沈集成指愛駒狀態未算最弗，加上初跑谷草，因此信心一般，能夠贏馬是意外驚喜，相信與莫雷拉一流的發揮有關。劉展灝說他和沈集成甚至很多馬迷都有同感，就是雷神真是可以騎高一班。他又指出愛駒上季曾經受傷，經過治療及休息後現已康復，希望馬兒未來實力再有上升空間。