特首梁振英之前聲稱有個5歲小朋友問佢：「我長大後住哪裏？香港還有沒有足夠土地？」衞生服務界李國麟（左圖）噚日喺特首答問大會，則稱前日見番呢個5歲小朋友，對方仲問佢點解唔見咗個生鐵郵筒喎。一直被質疑虛構呢位小朋友存在嘅CY唔知係咪心虛？回應時將李國麟誤叫「葉建源」，搞到向來唔道歉嘅佢即時向李道歉。
李國麟其實係問政府打算遮蓋郵筒皇冠徽號有冇必要，CY回答時卻指：「其實葉建源（右圖）提呢個問題唔係新問題」，泛民議員即時起哄話佢講錯：「人哋係李國麟呀！」CY隨即耍冧：「李國麟議員，對唔住。」
李國麟唔介意被叫錯名，反而食住上寸爆抹煞殖民歷史嘅CY：「歷史上我係叫李國麟議員。」雖則李國麟同葉建源都係戴住眼鏡斯斯文文，但泛民議員都唔覺佢哋似樣囉。