噚日重陽節，中國人習俗係去登高，估唔到蘋果行政總裁（CEO）庫克（Tim Cook）都識得入鄉隨俗！
庫克今年中開通微博，噚日朝早上載咗一張佢着住一身黑色運動服，行緊萬里長城嘅相片。佢仲寫上「重陽佳節再次回到中國很開心！清晨時分登上長城開啟新的一天。歎為觀止！」仲有埋中英對照㖭。
庫克冇透露因乜事再到中國，不過美國保爾森基金會（Paulson Institute）本周一提到，庫克將會參與今日喺北京召開嘅「可持續城市化CEO委員會」會議，庫克可能就係去開會。
庫克希望透過會議提升中國嘅綠化工作，幫助中國達到氣候目標。與會者包括阿里巴巴創辦人馬雲、萬科董事長王石、沃爾瑪CEO Doug McMillon等。
計計數，庫克自2011年出任蘋果CEO以來，已經第7次飛到內地，適逢今個禮拜六中國第24間蘋果店開幕，有傳位於大連，而且新店號稱係全球最大嘅Apple Store，估計庫克到時會去剪綵，順便吸客買新手機喇。