華將湯智傑嘅騎功如何，大家心目中自有評價，雖然佢近幾年成績幾乎例包尾，但由於香港策騎費高，騎師數目又有限，死馬（冇機會的馬）亦總要人騎，所以湯智傑每月閒閒地三四萬蚊以上收入，仍唔成問題。
今季湯仔只贏過「運財之星」一場頭馬，當然唔理想，但唔理想嘅係，剛周日沙田日馬，湯仔僅有四匹座騎，點知半數大漏閘，包括「會心微笑」起步零零舍舍獨慢，一匹靠放食糊嘅快馬，咁搞法唔輸就奇。
另一匹「藍天堡馬」仲衰，唔止大漏閘，湯仔失晒平衡撻落嚟咁滯，唉，真想講一句「湯仔，坐穩呀！」最終「藍天堡馬」輸唔夠兩馬位，如果唔係起步咁差，贏都唔奇囉！
作為師傅，方嘉柏都算唔話得，「會心微笑」跑成咁，今期（22日）夜賽繼續交一匹機會馬「薑餅人」畀湯仔騎，隻馬上次季內初出跑同程谷草1200米，狀態差一線都得季軍，只係輸個頭差啲贏埋，女神Icy黃婉曼丈夫馮柏基呢匹愛駒，經歷上季低潮後，睇嚟已全面復蘇。今次仲要有個2檔，咁嘅牌面，Icy一定扮到靚靚，入場等拉頭馬。相信湯仔都唔想令女神失望，亦唔想只賺策騎費而冇獎金，都係嗰句啦，「湯仔，坐穩呀！」