電盈（008）嘅香港電視娛樂公司正式將免費電視台改名做「ViuTV」，日前搵來一班藝人、前主播出席命名活動，活動上竟然見到有「小辣椒」之稱嘅股評人胡孟青（青姐），唔通青姐將會幫「小小超」李澤楷，喺呢個新電視台主持番個講股節目？
青姐自從2011年冇做有線財經節目後，都少咗喺公仔箱出現，忽然現身ViuTV活動，肯定有啲嘢。佢就話佢只係幫ViuTV一個口才節目《巨門陣》，做第一集嘅評判。
呢一集佢拍住前主播周嘉儀與林以諾牧師一齊做評判，對於節目內容，佢三緘其口，叫華華等到明年初電視台開台時自己睇。佢只透露，拍攝呢一集節目，用咗一晚大約6小時，凌晨收工，佢收咗封利是仔，至於有冇傾合作做其他節目，暫時就未有咁話。