特首梁振英治下，相信唔少港人都有同感，就係日子唔好過，而社會對立氣氛嚴重，都同政府取態有關，梁振英喺唔少問題上硬碰硬，逼到市民有氣冇得唞。好似最近委任何君堯同陳曼琪做嶺大校董，估唔到連工商界都覺得唔多妥，話港大副校風波先稍稍平息，點解又要搞嶺大激起民憤？難怪唔少工商界話梁振英撐唔落，甚至紮馬等住同佢開戰。
重勞輕商惹不滿
點解要開火咁緊張？無非係工商界權益受侵犯所致。皆因梁振英若要連任，肯定係向勞工界易過向工商界攞票，觀乎上屆特首選舉工聯會押注喺CY身上可見一斑。出得嚟行，預咗要還，CY政改寫明逐步取消強積金對沖以及研究標準工時立法，明顯係攞飛關鍵。其實工商界對取消強積金對沖呢場仗，有啲打定輸數，因為CY用咗「逐步」兩字，相信會為爭取連任而落實，懶理工商界不滿。至於標時立法，有工商界強調CY喺呢個問題上話「研究」咋喎，即係唔一定任內落實，所以喺呢個問題上一定企硬到底，冇理由讓完CY一樣又一樣。
但除咗以上兩樣，工聯會同工黨都就勞工假加「假」至17日，分別以簽名同提出私人條例草案逼政府做嘢，可見工商界仲面對緊另一場硬仗。有工商界大呻「冇計」，打工仔係CY嘅基本支持盤，難怪勞工界可以喺CY治下聲大大，乜都爭取一餐。
工商界想有好日子過，理所當然要換咗個特首，否則樣樣嘢都要同勞工界鬥一番，飲多多鉛水都唔可以延年益壽喎。
花生友
周二、四刊出