焦點經常都被放在與相差十四載的男友林峯拍拖，吳千語今年所接拍的電影一部接一部，剛剛才完成《葉問3》的戲份，就已經忙在韓國拍攝另一套新戲《賞金獵人》。今日上映的電影《王家欣》，除了入圍五個電影節之外，更為她帶來第一個演員獎項。千語實行用行動證明大家放錯焦點，不是戀愛大過天，不是花瓶，而是剛升班的電影新生代。
統籌：林妙萍
撰文、造型：陳蔚渝
攝影：周樂恒
化妝：Zoe Fan
髮型：Jo Lam of Queen's Pi
吳千語過往所接拍的電影都是偏向商業化，最近上映的主演電影《王家欣》，則難得地是香港本地製作，導演取材自92年的香港，刻意在坪洲取景，「係我第一次接拍呢個類型嘅電影，之前都係偏向商業化，𠵱家嘅電影類型都比較少真係本土製作、唔係合拍片，取景喺香港，題材喺香港，我自己覺得幾鍾意呢個類型，對一個演員嚟講可以有更多發揮。」
拍戲攞獎第一次
千語在戲內飾演一名叫王家欣的女生，與男主角黃又南首次結片緣，「講述又南搵緊一個叫王家欣嘅女仔，但嗰個女仔唔係我係第二個人嚟，其實係一個幾sad嘅愛情故事，佢一直好努力尋找佢想搵嘅王家欣，但我鍾意咗佢，但又要幫佢，係一個節奏比較慢嘅愛情故事。」問到90後的千語與又南合作，有甚麼趣事發生，「我唯獨記得佢無啦啦問我，其實你93年出世識唔識Shine？ 我話梗係識啦，其實講真我冇特別留意佢哋，不過當然最出名嘅歌，好似《燕尾蝶》就有聽過，因為90年代樂壇有好多香港歌手，頒獎禮好好睇，但其實好多嘢都係𠵱家聽番人講，因為我當時太細個冇乜記憶，嗰時香港係一個好興旺嘅年代。」
千語憑電影更取得入行的第一個演員獎，「其實我對攞獎又唔係特別大期望，呢個階段都係希望試多啲唔同類型嘅電影，作為一個演員其實好被動，有時唔係你想就會有合適嘅劇本搵你，有時要等，有時又要揀，我都希望可以有多啲機會去做唔同嘅角色，少啲商業化我都唔介意，我都想試多啲偏向藝術嘅嘢。」
衝出香港第一次
千語另外有份參演的《葉問3》早前也剛剛煞科 ，「我演一個老師，不過就冇打戲，文戲為主，會對住很多小朋友，角色成熟過以前，以前一路都係演廿幾歲𡃁妹，成個人都會成熟啲，冷靜啲。」問到會否因為拍打戲而想挑戰打女角色，「我會覺得自己handle唔到，當然如果要做都可以，不過就可能需要一個好認真嘅training，可能三個月認真學，睇完一啲世界級嘅人會覺得自己呢方面知識係零，我自己又太瘦，可能要食肥啲先有說服力。」
忙完《王家欣》的宣傳之後，千語已經要馬不停蹄趕回韓國拍攝新戲《賞金獵人》，與韓國導演、男神李敏鎬、鍾漢良及唐嫣等合作，「這部戲很有趣，因為對住韓國人時，我哋會嘗試講英文，睇吓佢哋明唔明，但對住工作人員又會講廣東話，另外又有講普通話嘅演員，所以劇組係非常international，係一個好好嘅經驗去學習，無論係韓國人嘅認真，又或者態度，因為相對香港導演係完全另一個做法。」
問到會否想再和男友合作拍電影，千語就表示唔多想，「其實我哋有討論過呢個問題，但大家都唔想，唔想太刻意，亦都冇人搵我哋，同埋聽講情侶做嘅電影都唔收得。」
結婚未有打算
今年的世紀婚禮一個接一個，千語雖然與林峯穩定拍拖多年，不過就未有結婚打算，「我未去計劃，所以唔會係嚟緊好近嘅事，我都唔想太遲生BB，因為成日覺得自己身體唔好，所以想喺一個keep得好嘅狀態下生BB，想喺三十幾歲前有自己小朋友。」
對於婚禮，千語認為只是一種儀式，所以都未必會大搞，「其實都冇咁多朋友要請，應該唔會係一件好大嘅事，人少少可能只係請最close嘅人。」兩人有甚麼相處之道，她說：「忍讓同互相鼓勵，尤其是兩個人都特別忙嘅時候，其實好需要互相支持，因為可能大家都會冇咩時間見面，另外要互相信任。」
天生不是購物狂
千語經常都被拍到行街shopping買名牌，不過就否認自己是購物狂，原來行街都係為工作，「其實我買一樣嘢會用好耐，所以唔算成日行街，可能兩個月一次，八成係工作，其餘兩成先係買自己嘢，主要都係tee、牛仔褲，最鍾意買波鞋，無論咩牌子，可以一笠入去就着到，好少着高踭鞋。鍾意買實用嘅嘢，無論平又好，貴又好，質地最重要。」行街shopping對好多女生嚟講都係一種減壓方法，不過千語就反對，「我未試過好大壓力，買嘢解決唔到壓力，買嘢係可以好攰，應該去relax，游吓水。」
更多精采時尚內容，盡在 http://add.appledaily.com 。
