今年A股走勢似玩過車山，大家都望實中國證監會有乜動作，新近有傳中央財經領導小組辦公室國際經濟局（四局）局長方星海，被調任為中證監副主席，負責國際業務，接替屆退休年齡嘅副主席劉新華。
本港金融界對方星海應該唔會陌生，事關呢位仁兄2011年擔任上海市人民政府金融服務辦公室主任時，公開寸過香港定為國家國際金融中心，係自己訂立嘅目標，又向香港發展為離岸人民幣中心大潑冷水，搞到金管局總裁陳德霖都要公開回應幾句，之後中港兩邊官員都好少談呢段插曲。
若然方星海真係擔任中證監副主席，本地財金官員可能又要準備接招了。