習近平明日到曼徹斯特市，參觀「城市足球集團」，引起內地網民討論。講足球，曼徹斯特嘅曼聯更有悠長歷史，歷來戰績輝煌，世界知名度與富有程度，僅次於西班牙皇家馬德里，點解習大大唔去曼聯而去曼城呢？
有分教。曼聯名氣係好大，但幕後大股東係美國人，格拉沙家族（Glazer），呢個家族視體育為一盤投資生意，於2003-2005年間用財技方式（槓桿或併購）買入曼聯九成控制權，令曼聯負債一度高達五億二千萬英鎊。曼城呢？球會戰績過往冇咁好，屬於足球暴發戶，歷史上屬工人階級式球會，擁躉比較窮，冇曼聯球迷咁有錢，2007年由前泰國總理他信收購，他信被泰國政變趕下台後，球會由Abu Dhabi United Group買入，從此大事擴張，廣泛收購世界足球明星，香港英超球迷對此非常熟悉。
呢個Abu Dhabi United Group係阿聯酋（UAE）嘅私募基金公司，老闆係阿布扎比皇室成員Sheikh Mansour，銀紙多到唔恨，與美國格拉沙家族比較，係牛髀與蚊髀之別，曼城主席穆巴拉克曾去過北京，可以拜見習近平，級數零舍唔同，近20年中國極力拉攏中東產油國，在石油、石化工業方面加強互相投資合作，阿布扎比私募基金也在中國投下巨額資金。
講到尾，曼聯計老闆背景與投資遠景，都唔係中國要統戰嘅對象，曼城先至係，習大大咁精明，身邊又有咁多謀臣，自不然知道到英國搞足球外交，有一石二鳥之效，表面上俾足英格蘭英超面子，令首相金馬倫嗒糖，骨子裏則乘機與中東大富豪行埋啲，足球上容易得到曼城球會技術支援，中國與阿聯酋之足球投資與外交關係更進一步。現實世界不是講理想嘅世界，而係講金錢拉關係嘅世界，英國政府為咗中國錢，邊度會對抗中國政府，為香港法治、民主選舉出半句聲吖？阿聯酋投資曼城足球會花費巨大，雖則上一個球季已經開始賺到錢，但回報與投資不成比例，不過憑足球可與中國及習近平做老友，政治得益又大到難以估計，球場上爭取到英超冠軍以至歐聯冠軍，只係額外花紅（bonus）而已！