韋達停賽兩期後，將於周四（22日）賽事刑滿復出，上季他試過一次停賽復出，結果即有馬贏，而且該次賽事超過半數座騎上名，可見餓馬後鬥志特別好。今戰韋達騎足八場，其中「歡喜」及「駿將」均出自告達理馬房，騎練近兩季合作五Win皆在谷草取得，以上兩駒都有可能成為韋達復出頭馬。
第三場「歡喜」今季已跑過兩仗，雖然唔上名，但落敗距離一次比一次接近，反映狀態正循序漸進，抽得二檔起步，對這匹快馬是一大有利因素，事關此駒轉投告廐後，兩次排內檔跑谷草全勝，憑檔位之利有力重開勝門。
另外，第五場「駿將」今季踏入五歲表現可謂大熟大勇，三次上陣取得一冠一亞一殿佳績，今仗回配贏馬拍檔韋達，既然前仗12檔都贏，今次排11檔亦不能輕視。