泛民主派選舉冇乜資源係人都知，但究竟要慳家到點地步？睇睇喺南區利東爭連任嘅民主黨區諾軒就知。
區諾軒日前喺fb貼咗佢候選人編號3號貼紙（圖），問大家有冇留意貼紙印製日期係08年8月11日？佢話大家冇睇錯，貼紙確係7年前印，但佢唔係未卜先知，而係用緊民主黨7年前剩餘物資！原來7年前立法會選舉，民主黨甘乃威名單又係3號，因為選舉要用好多資源，當年甘威名單用剩嘅紙張、宣傳牌、貼紙，可以留低再用嘅全部都保留，估唔到7年後真係用得着！區諾軒感嘆話，7年前佢仲讀緊Year2，當時冇想過會入政黨兼參選。同區參選人仲有民建聯李嘉盈及熱血公民黃潤基。