剛周日沙田賽事排位前，潘頓向沈集成話擔心自己造唔到120磅，推庄「超有利」而改騎佢老友梁芷珊愛駒「文藝復興」，但明明上周三隻「糖黐豆」潘頓又造到120磅，搞到沈集成火都嚟埋，代表「超有利」陣營，向馬會投訴潘頓。
咁又難怪沈集成，話晒佢多年來有唔少好馬益潘頓，遠有「小橋流水」遠征英國贏大賽，近有上季憑「總統至上」、「超有利」等駒，加埋令潘頓進賬10場頭馬，何況「超有利」今次潘頓先應承再反口，焗住換級數低幾皮之蔣嘉琦，走位唔多順暢都只輸半馬位梗頸四，斷送一次黃金機會。再睇周四(22)夜馬第四場四班一哩賢廐之「有意思」，評118磅潘頓都照接上陣，情何以堪？就更加唔怪得沈集成堅嬲。
潘頓之前已冇咗告東尼、大摩兩個地盤，蔡約翰季內亦冇馬畀佢跑，家陣再失去沈集成呢個大馬房，就算沈集成睇見潘頓造磅騎「有意思」睇到眼冤，潘頓亦只能焗砌，執嘉琦妹手尾。
上次「有意思」喺嘉琦BB胯下出閘大脫腳大熱落第，都幾肉酸，復課潘頓試大閘，起步成支箭咁彈出放返大勝，證明隻馬出閘同狀態都冇問題，諗諗吓如果今場「有意思」力壓沈廐「杰歡騰」贏馬，潘頓都可能幾尷尬，不過各為其主，冇辦法啦！