唔少人閒時愛行山，欣賞郊野公園景色之餘順便影相打卡呃like。經常搜刮自然美景嘅攝影團隊「流浪攝」推薦上洋山同九龍坑山兩條路線。
上洋山高250米，清水灣道出發，喺涼亭旁嘅石梯拾級而上，就可到達相對平坦嘅釣魚翁郊遊徑，沿路再上，穿過竹林後就到山頂，可以睇到西貢內海同牛尾海，東可遠眺萬宜水庫，影日出至正。若要登山可沿郊遊徑再向前走，否則繼續直行落山就可以喺大坳門道離開。全程約3小時。
高440米嘅八仙嶺九龍坑山相對難度較高，喺大埔中心出發，經富善邨轉左出汀角路，經鳳園路入口再前行就會見到沙螺洞路入口，沿山徑直上可抵達山頂旁嘅平地，大埔、吐露港、八仙嶺景色一覽無遺，現場仲有唔少電訊發射站同大型電視塔，係另類靚景。回程時往松嶺方向落山，途中有段相對難行嘅泥石路，但一出路口就係大埔市區。全程約4至5小時。
「流浪攝」由聯師兄、露伊及Tony組成，最近一年設立「流浪教室」辦山野攝影班，以鏡頭推廣本地郊野之美。露伊話為影日出不時漏夜啟程上山，影完直接返工。