區選臨近，候選人各出其謀，就連公廁都唔放過。八方噚日經過調景嶺巴士站，見到個易拉架寫住「得獎公廁Award Winning Public Lavatory」，唔少途經市民都竊笑，「得獎公廁？唔係啩！」笑完就跟住入去放低幾両，感受吓有幾巴閉。
Banner下面有財經及時事評論員孫柏文嘅頭像，咪以為佢俾人惡搞，孫柏文證實係佢傑作。佢話兩年前收到街坊投訴，每逢春秋二祭，商場廁所都逼爆，後來佢同華人永遠墳場管理委員會開會，對方整咗張A4紙叫人去公廁，佢覺得冇乜用，不如自己嚟，sell吓個公廁2006年攞過優異公廁獎，希望疏導人流，「呢啲都算基本社區工作，我個心態就係咁」。
孫柏文咁瞓身，相信都同區選有關。佢已經報咗名喺呢個公廁所屬嘅西貢區議會都善選區出選，同區對手有莫繡安、張展鵬同蘇浩。四爭一咁激烈，唔出奇招點得掂？