中國財神爺習近平10月19日英國時間晚上抵達倫敦訪問，10月23日下午從曼徹斯特乘專機返回北京，五日四夜內接受英國的「國王級禮遇」，在倫敦入住白金漢宮，英女皇皇室三代人參與接待活動，讓習近平夫婦享盡尊榮。在中英兩國交往史上，這大概是清代乾隆盛世以來，中英兩國第一次進入外交黃金時代（金馬倫語）。中國近代史多由1842年鴉片戰爭開始講起，香港由此而「橫空出世」，一百七十年來成為閃爍耀眼的東方之珠，對中國而言，1997年「合浦珠還」，再18年後，領導人強勢訪英，英國人叩頭（10月19日FT頭版講kowtowing），目的只為求中國大爺多賞幾百億英鎊，習大大為中國盡吐鴉片戰爭的烏氣，內地官媒網媒不知會否為此寫下可歌可泣的一筆。
習大大與英國首相會談甚麼國家大事，左丁山不管，反正英國人為求中國投資與訂單，重演1793年馬戛爾尼覲見乾隆皇一幕，也似乎在所不惜。左丁山留意嘅，係習近平到倫敦帝國學院參觀，唔去金馬倫首相嘅母校牛津大學，或去劍橋大學。帝國學院以理工科著名，工程師科學家輩出，香港兩位知名校友就係郭炳湘，郭炳江兄弟，習大大去睇理工帝國學院，可能意義係中國要以科技興國，要領略吓英國在科技教育方面的經驗。
依家有大把嘅中國富豪識做啦，以後要送子女入帝國學院，捐錢以帝國學院為對象呀，唔好淨係識得牛津劍橋、LSE咯。另外有興趣嘅係，習大大特登會飛去曼徹斯特，10月23日上午由財相歐思邦陪同參觀曼徹斯特大學國家石墨烯研究所，下午就由金馬倫親自陪同去訪問「城市足球集團」，講開大生意、國家大事，科技潮流，點解會加插一個「足球訪問」呢？想來係中國嘅要求，因為習大大係標準足球迷，佢嘅中國夢之中有一個中國贏得世界盃之夢，中國主辦世界盃之夢，比較容易實現，中國要贏世界盃喎，習大大要長命百歲起碼，或者可以見到，就算英格蘭，上次贏世界盃，已係金馬倫出世之前（1966年中，金馬倫生於1966年10月9日）。人生有個夢想總是好事，習大大到曼徹斯特，參觀曼城，而唔係曼聯，唔知係唔係因為曼城有阿聯酋酋長做後台，曼城一眾球星會唔會空群而出列隊歡迎呢？由習大大出面邀請曼城為中國訓練足球人才，阿聯酋老闆一定答應，到英國訪問，利用足球順便統戰中東產油國，高招也！