雖然區議會就殺到，但大家千祈唔好唔記得仲有一年半之後嘅特首選舉。盛傳會問鼎下屆特首寶座嘅梁錦松繼答應出席民建聯嘅圓桌會議，大談香港宏觀經濟，而阿松本周日邀請咗另一特首黑馬、財政司長曾俊華出席佢做主席嘅小母牛競步善行。嘩，兩代財爺咁friend，難道已經傾掂數？總之雙劍合璧，能否將梁振英擊倒，未打已經一地花生。
慈善行嘉賓多唐營
戲碼唔止有阿松同鬍鬚曾拍住上咁簡單，今次阿松重鎚出擊，慈善行主禮嘉賓有17人咁多，主禮嘉賓名單第一位係曾俊華，第二位就係鄉議局主席劉業強，鄉議局選委當年提名唐英年做特首，曾俊華同劉業強當日會一齊為「親子組3公里愛心跑」鳴槍，咁唔知幾時為特首跑馬仔鳴槍呢？
名單上仲有當年力挺唐英年做特首嘅前經濟發展及勞工局局長葉澍堃，葉澍堃曾經係唐英年嘅競選辦成員，不過佢都係小母牛香港嘅副主席，出席活動名正言順。主禮嘉賓仲有地產界嘅立法會議員石禮謙，阿石係地產商嘅發言人，企埋喺梁振英對面實屬正常，唔講唔知，原來阿石都係小母牛香港籌款委員會委員。所以有人話𠵱家只有香港營，唔知係佢無知定以為市民無知囉。