國師陳雲搵兩大入室「皇親國戚」，「國舅」楊偉業同「昭明公主」鍾銘麟、𠵱家改名「中出羊子」參選區議會。不過唔知因乜嘢事，「國舅」突然話因個人問題放棄出選，而中出羊子又俾選舉事務處話佢政綱中「香港建國」呢句牴觸《基本法》，要中出羊子刪，令城邦派有得參選都冇得建國！
「國舅」突退選
楊偉業原本出選馬鞍山大水坑區，但佢噚日突然在facebook宣佈，基於個人原因，決定退出今次區議會選舉，仲話向各方朋友道歉，浪費大家一片苦心及期望，雖然如此，佢強調以後仍會繼續以建國為行動目標。
至於中出羊子，就喺fb貼咗封選舉事務處畀佢嘅信，信件係關於「修改候選人簡介內容」，該處指佢政綱入面有提及「香港建國」，官府指呢句政綱同《基本法》第一條，即係「香港特別行政區是中華人民共和國不可分離的部份」有牴觸，顯示佢「作出違背《基本法》及法律聲明內容」，所以選舉事務處根據《區議會選擇活動指引》，要求刪除該字句，重新交政綱。
唔刪「建國」字眼交出新政綱，中出羊子可能不符參選資格。不過中出羊子一於好少理，仲喺fb貼文話香港建國主張執行方法，係以《基本法》第159條訂立嘅機制，修改有關香港地位條文，同「擁護《基本法》」並無牴觸，表明唔會交修改版本，若果選舉事務處強行刪改，就會積極考慮司法覆核，擺明要同政府玩嘢！中出羊子係咪真係會司法覆核，八方同好多人一樣，買定花生等睇好戲。
李八方
mailto:[email protected]