香港市民又有一個免費睇大賽嘅機會喇！今次輪到高爾夫球，總獎金提升至200萬美元（約1,560萬港元）嘅香港高爾夫球公開賽，聽日起一連四日喺粉嶺香港哥爾夫球會舉行，首日仲免費畀球迷入場感受大賽氣氛，認真唔錯。
衞冕漢特最愛港美食
同上星期香港女子網球賽一樣，香港高球賽首日繼續唔收錢，球迷先喺網上登記，每人最多可攞兩張飛（詳情可登入www.ubshkopen.com），第二至四日嘅套票票價就由150元至600蚊港元不等，購票通（www.cityline.com）有售。其實今年香港高球賽有冠名贊助，參賽球手戲碼唔錯，噚日大會就請咗部份球星出席賽前記者會，除咗世界第七嘅英格蘭羅斯（Justin Rose）同世界第八嘅美國莊遜（Dustin Johnson）外，仲有衞冕嘅澳洲球手漢特（Scott Hend）同中國19歲新星李昊桐，佢哋去到中環遮打花園同冠軍獎盃合照時，個個都對獎盃虎視眈眈。
漢特近期狀態大勇，星期日先贏完澳門公開賽冠軍，擸咗約140萬港元獎金嚟香港衞冕，佢仲大讚香港美食：「我最鍾意食香港點心同燒鴨；粉嶺球場同澳門嘅草差唔多，兩地氣溫又相近，希望對我有利。」至於第一次來港嘅李昊桐，問到目標時話最希望出戰明年里約奧運喎。