李斯特城喺今季英超咁堅，踢咗近四份一賽程仍然排喺第五位，到底有乜嘢秘訣？可能就係「快」。英國《鏡報》最近披露咗英超最高速球員排名，最快嘅唔係禾確特，而係李城嘅占美華迪；唔單止咁，前十排名裏面佔咗一半係李城球員，難怪隊波喺今季場場波都快上快落，場場都有入波。
華迪最快 史達寧唔入流
呢個統計嘅資料係由英超賽會嘅官方合作伙伴，《FIFA16》遊戲出產商EA SPORTS提供。一講到英超最快球員，球迷可能即刻會諗到阿仙奴嘅禾確特或者曼城嘅史達寧，結果呢兩位快馬意外地都係前十名不入。據統計指出英超最快兩位球員都係李斯特城球員，分別係占美華迪同埋舒洛比，佢兩個嘅最高時速分別係35.44同35.26公里。唔單止咁，喺前十名最快英超球員裏面，仲有多三位李城球員，包括中場馬克艾拜頓、守將迪拿特同埋中堅韋斯摩根。唔係啩？睇直播呢位大件頭中堅唔似都跑得咁快喎。數據嘅嘢真係當參考好喇！老實講，有一班電兔快上快落，「後上王」李城喺今季嘅表現確係夠晒娛樂性，入19球喺英超入球第三多，但失成17球亦只有三支球隊比佢哋多。
馬田奧臣咁Fit都「超重」
走得快好世界，咁嗰身重係咪一定唔着數？咁又未必，據統計有唔少英超球員嘅BMI（Body mass index，身高體重指數）都有超標情況。一般指引BMI超過25就屬於過重，有減肥必要，不過始終呢個只係參考數值，單睇數字顯示唔到脂肪比率。諾域治嘅馬田奧臣BMI值有28，屬英超最高，不過佢喺周日場波都貢獻咗兩球靚助攻；其他英超球星好似耶耶托尼、盧卡古、甚至頭先提過嘅「快馬」李城中堅韋斯摩根，全部都排喺前20名內；反而我求大俠喺排名度就搵唔到今季突然脹爆嘅車路士前鋒迪亞高哥斯達，佢就真係要修下身嘞。