【本報訊】在西環街頭遇狂徒被斬輕傷的65歲林伯是附近水電舖老闆，當時他被兇徒用利刀直指肚皮，幸及時側身閃避，並打掉對方的利刀得以保命。他笑言自己「食過夜粥」，曾學習虎鶴雙形拳，但亦頻呼好彩，「如果拮入咗，我就唔會喺度同你（記者）講嘢！」
「疑犯雙眼好似發光」
林老闆指事發時他剛飲完早茶步出酒樓，平日他習慣飲茶後經西邊街返回開舖，但昨晨要買豬肉，所以改行德輔道西往豬肉檔。他指當時自己身處電車路的安全島，只見疑兇衝過來，「佢攞住把刀拮埋嚟」。他形容疑犯目露兇光，雙眼「好似發光咁」，他自然反應是「側一側身」避開，「佢斬向我個肚，我用手拍開佢把刀就走，之後見佢追住兩個女人」。
當時有兩名女子經過，隨即成為兇徒追斬目標。林稱兇徒「執番跌咗嗰把刀，用雙刀追斬女途人，他聽到有人嗌晒救命」。對於自己險被刺中腹部，林伯猶有餘悸對記者說：「如果拮入咗我就唔會喺度同你講嘢！」林伯事後在場協助警員調查，他引述有警員指他「好好彩」，着他要買六合彩。
不少街坊對有狂徒當街斬人均表害怕。梁小姐稱：「遇到咁嘅情況，肯定驚啦！」另一名黃女士則謂她過往在街頭也看到有疑似精神病人在大叫大嚷，「但冇理由唔落街嘛，都要買餸啦，惟有行街時加倍小心」。
■記者劉柏麟