中國媒體噚日用「巾幗不讓鬚眉」去形容香港桌球一姐「四眼妹」吳安儀，佢喺亞洲桌球巡迴賽海寧站外圍賽對中國男球手丁凱，領先兩局下惜以3:4敗陣。另一方面，香港桌球迷將大飽眼福，因為由前世界一哥威廉斯同香港一哥傅家俊領銜嘅「名將盃2015」，下月16至21日會喺尖東舉行，仲係免費入場㗎。
挾應屆世界女子錦標賽同英錦賽雙冠軍身份出戰亞巡賽嘅安儀話：「比上年參加同一類型嘅亞巡賽（東莞站），今日整體發揮都進步唔少，但對男選手仲係有啲緊張，放唔開去打，比賽嗰陣亦考慮多咗，雖然贏唔到，但最緊要學到嘢。」今次再次挑戰亞巡賽，安儀一埋枱就好唔客氣咁以70:36、64:31先贏丁凱兩局，可惜對手喺第三、四局還以顏色，安儀輸61:62同20:67。去到第五局，安儀再次發威贏59:21，領先3:2，但因為顧慮太多，最後兩局分別輸49:61同0:106，局數以3:4敗陣。但佢話今次經驗對下月初喺埃及舉行嘅世界業餘桌球錦標賽爭后冠有幫助！傅家俊同中國丁俊暉周一喺首圈都以4:1晉級。
威廉斯襲港鬥傅家俊
安儀下月去埃及比賽，香港名將盃咁啱都喺下月舉行，冠軍獎金有12萬港元，如果打出滿分147，仲有14.7萬元獎金兼獲得價值22萬嘅鑽石cue，所以吸引到八位職業球手來港。現世界排名14位嘅前世界冠軍威廉斯（Mark Williams）將會同傅家俊、「抗癌勇士」卡達（Ali Carter）、威爾遜（Kyren Wilson）同組。另一組就有高特（Martin Gould）、佩利（Joe Perry）、米高韋德（Michael White）同中國嘅張安達；小組打單循環，每組前兩名入四強，賽事歡迎球迷免費入場。
