臨近年尾，好多內地科技公司都趕住推新產品，希望谷吓銷售額，好似小米咁，上月底先公佈推新手機，噚日又喺北京搞產品發佈會，不過今次唔係推新手機，而係其他智能產品，仲首次推出年輕人潮物──電動平衡車。
小米將呢部平衡車叫「九號平衡車」，部車有兩種玩法，一係靠身體平衡駕駛，一係用手機藍牙遙控，噚日發佈會上，首先有人遙控部車、載樽水上台畀主席雷軍解渴，唔使講都知道雷軍跟住企上部車度露番兩手喇。
佢企喺上面轆前轆後，雷軍聲稱之前冇練習過，所以轆得比較慢，總算冇失威跌落地。小米嘅產品出名較平，呢部車賣1,999人仔，等於同級別產品四分一價錢，不過呢部車暫時只供內地用家訂購。