區議會選舉11月22日開戰，有讀者向八方報料，話喺屬北區嘅上水丙崗村，掛咗一張寫住「溫馨提示 選舉期間，全程專人監察」嘅橫額（上圖），下款係上水區鄉事委員會。
因乜解究上水鄉委會撈埋政府嗰瓣？「我想做選舉事務處處長吖嘛。」上水鄉委會主席侯志強承認banner係鄉委會掛嘅；唔只丙崗，上水南北鄉郊有成10條，「因為好多人種票，我哋係替天行道、維護法紀、伸張正義」。侯志強聲言，相關種票個案投訴無門喎，所以要出banner警示一下，仲話選舉當日會派30個村長喺鄉郊巡邏做糾察。唔驚banner嚇親人咩？「唔好用掌心雷、唔好被投票，咁咪唔驚嚇親囉」。睇番北區，唔少選區都係民建聯同鄉事派對陣，佢哋不嬲好多牙齒印㗎喎。