萬聖節好快就到嘞，又係猛鬼出籠嘅時候，尤其係搞緊哈囉喂嘅海洋公園，但有一隻嘩鬼就好面熟，原來係海洋公園副主席劉鳴煒扮嘅魔鬼（八方估係魔鬼啩，因有一對角喺頭）。
劉鳴煒將自己扮鬼嘅相，放咗喺自己facebook，留言要令少女尖叫。見佢全身都悉心打扮，着晒成套衫、化埋妝，仲整埋個好恐怖嘅表情，都吸引到唔少遊人搵佢合照，可能以為佢都係扮鬼嘅工作人員。估唔到繼前主席盛智文後，海洋公園又有個新一代扮嘢天王。
八方向海洋公園了解過，話副主席嗰日係自己去公園玩咋，但佢喺10月23、24、25同31號，都會再去公園扮鬼嚇人，大家到時隨時可以喺園內野生捕捉佢。