勢估唔到大四喜都有量產，巴塞隆拿前鋒尼馬上周六聯賽就入四粒，幫球隊大勝華歷簡奴，周日英超獨腳戲，紐卡素6:2狂數諾域治，就輪到荷蘭新兵韋拿杜姆個人入四球；韋拿杜姆大發神威就真係幫到領隊麥卡倫減壓，因為苦戰到第九周聯賽先至打開勝利之門，韋拿杜姆亦係球會繼舒利亞之後，第二位英超單場入四球嘅球員，能夠同英格蘭名宿睇齊，領隊麥卡倫就好開心咁話：「呢場波大家睇到佢嘅能力啦，證明我由荷蘭帶佢嚟英超呢個決定冇錯㗎。」紐卡素拎到三分後，就由包尾嘅20位升上18位，不過前景都唔多好，下周日場東北打吡作客新特蘭，睇吓韋拿杜姆仲有冇得繼續威。