呢輪香港電影圈突然好有青春氣息，彭浩翔監製、《春嬌與志明》編劇陸以心執導，以及由郭奕芯、廖子妤、麥芷誼同王宗堯主演嘅《同班同學》下周四上映，跟住黃修平部《哪一天我們要飛》就喺下個月5號上，呢兩部戲可能會令觀眾重拾青春感覺。
爭最高榮譽銅馬獎
講番《同》片，呢部戲噚日發佈咗劇中女主角嘅性感內衣相同埋沖涼照，其實三個女仔都演得幾放，郭奕芯全裸出浴對住王宗堯都無怯場，仲全身泡泡攬埋去。《同》片係講三位女學生迎18歲嘅仲夏，為錢同意氣去援交，又因爭仔，初次體會單純友誼中嘅黑暗同背叛。電影就繼入圍東京國際電影節之後，再衝出歐洲，噚日宣佈入圍瑞典斯德哥爾摩國際電影節，爭奪最高殊榮嘅銅馬獎，對上兩部入圍銅馬獎嘅港片已經要數到96年王家衞嘅《重慶森林》同08年黃秋生主演嘅《蕩寇》，《同》片又入圍波蘭華沙五味電影節。
彭浩翔知道之後當然好開心，佢話：「陸以心第一次做導演，部戲都未喺香港上就可以得到咁多國際影展認可，真係好難得。過兩日我會去日本參加東京國際電影節行紅地毯，希望到時會有好消息帶返嚟啦！」
撰文：馮仁昭