如果一間戲院，喺半夜都有戲睇，相信一班夜鬼都好開心，但係如果你去買飛，發現由凌晨12點幾開始，去到朝早5點幾所有場都爆晒，一張飛都買唔到，你會諗…套戲真係咁多人睇；套戲有人做數呃票房；定係有啲污糟嘢去咗睇呢？不過大家又唔使咁擔心，因為喺香港就未有呢啲事發生，講緊嘅係喺內地，最近出現咗個詞語「幽靈場」，意思就係啲場次一開售十分鐘就賣晒，而啲時間又古古怪怪嘅場次。
喺今年內地兩套最高票房嘅電影《捉妖記》同《港囧》，都出現「幽靈場」嘅情況，據網民「電影票房員警」圖文並茂指，《港囧》喺10月1號嘅凌晨12點35分開始至早上5點50分，一共有十場，仲要場場都滿坐，之但係喺9月30號黃金時間，即係正常人睇戲嘅時間朝早9點到晚上11點，嗰時場次就唔係滿坐。
另外，網民「電影票房員警」仲親身去戲院，問到有冇半夜嘅場次，工作人員就同佢講最後一場係11點45分，之後都冇其他場次，唔通真係留畀啲….
而《捉妖記》就更厲害，喺早上嘅時段，就出現一個情況，就係一套2個鐘頭嘅電影，9點10分喺一院開場，之後喺9點30分一院又再開場，2個鐘變20分鐘？唔通係入場睇預告？
其實以上嘅奇怪事相信大家都明白點解會發生，都係因為兩個字「票房」，而內地電影局就喺10月14號頒發咗「關於轉發《電影院票務系統(軟體)管理實施細則》的通知」，呢個細則就係針對「幽靈場」而設，其中有兩條條例係咁：
1. 電影院(含電影票網路代售商)須於每次售票操作完成後的10分鐘內將每張電影票的相關原始資料上報至國家資料平臺。
2. 電影院須于當日12時前向國家資料平臺上報前一營業日統計資料，上報的統計資料應包含前一營業日內所有放映活動的資料。
即係話如果又有啲夜滿坐嘅情況，咁唔正常嘅現象就會引起相關部門嘅注意，就算當晚冇人留意到，第二日再次上報嘅數字都一定會令相關部門懷疑，咁就可以控制到「幽靈場」嘅情況。