各大政黨忙於搞區選，點知全港第一大黨民建聯仲有閒情逸致喺本月底同下月初搞三場圓桌會議，討論經濟、傳統產業同民生議題。而首場嘉賓就係盛傳下屆特首黑馬嘅前財爺梁錦松，即時令人聯想民建聯，係咪搭台畀阿松大談治港藍圖先？主席李慧琼強調「冇考慮到呢點」，仲笑笑口話喺唔同論壇上，「其實梁錦松都係好活躍嘅嘉賓」。
退出民主黨嘅狄志遠同黃成智，亦會分別擔任首場同尾場嘉賓，佢兩位都係成立咗「新思維」組織後獲邀，李慧琼話期望唔同政治立場嘅持份者可以一齊討論。民主思路召集人湯家驊則仲未回覆係咪出席，另一位獲邀嘅民主黨前立法會議員李華明已經拒絕。李慧琼話會整合會上建議，喺政府就新一份施政報告同財政預算案進行諮詢時提交。