近幾個月向聯交所申請上市嘅公司，名字都幾有趣，之前有兩隻喺內地做飲食業嘅公司，分別叫做「避風塘」與「扯旗山」，又有一隻有賣血漿製品嘅「興科蓉醫藥」（諧音庸醫），噚日又有一隻叫做「愛得威」！
呢隻「愛得威」究竟做邊瓣生意㗎呢？愛得有幾威呢？哈哈，查實呢間公司係做建築工程，總部設於深圳，業務包括建築裝飾、機電安裝、玻璃幕牆同埋消防安裝工程。
內地公司來港上市，要改中文名，通常都係按英文名嘅讀音去改，愛得威嘅英文名叫「Adway」，講講吓就變成「愛得威」，可能老闆聽見都覺得威，咁咪照用囉！不過對於股民嚟講，最緊要係公司上市後，股價升得威㗎啫。