思捷環球（330）上年度業績認真麻麻，轉盈為虧，蝕近37億元，係1993年上市以來業績第二次見紅。但係最新年報顯示，獨立非執行主席柯清輝竟然獲得加薪51%！
不過小股東們唔好嬲住，睇清楚，柯清輝過去兩年嘅袍金冇變，都係215萬元，只係舊年多咗一筆約值110萬元嘅購股權，令到佢總年薪增加五成啫。董事局裏面，最高薪嘅，當然係行政總裁馬浩思，佢舊年年薪3,509萬元，變動不大。
思捷嚟緊嘅管理層薪酬開支應該增加唔少，事關公司早前委任亞洲LVMH時裝集團前總裁雷冠伯（Guillaume Thery）做亞太區總理，負責思捷亞太區包括中國業務。雷冠伯上月中上任，之前負責LVMH旗下包括Celine、Loewe等品牌中國與南韓業務，估計佢嘅年薪唔會低囉。