雖然長建（1038）的新提購方案，把特別息由每股5元增至7.5元，但不少電能（006）股東仍然狠批，說這些錢不過「羊毛出自羊身上」，仲要和長建股東瓜分，咁都算得上是「加價」？芬佬朋友說得好，有人「洗劫」完你荷包，無論佢留返5元、還是「加價」到7.5元畀你搭小巴，啲錢原本都是屬於你的，難道你要為此感激流涕嗎？
還記得去年電能分拆港燈（2638），管理層曾力撐電能套現後，可有大量彈藥在海外併購；如今卻選擇性失憶，聲稱電能坐住680億元現金，「冇地方使」。當日電能曾和長建訂協議，但凡長建有意收購任何能源項目（包括電和燃氣），必須搵埋電能一齊方可投資，意味電能增長空間，原本就well-protected。除非長建打算以後完全唔掂能源項目，否則何愁電能資金無出路？一般私有化交易做不成，小股東最擔心是大股東會趁機「無心戀戰」，做殘股價。不過長建主席李澤鉅說得好，長建、電能是「心掌係肉、心背又係肉」，兩者自然一榮俱榮，一損俱損。既然長建前景如此亮麗，電能又會差得去邊？難道交易否決後，電能會「玩嘢」唔派高息？身為股東而又求財若渴的長建，仲緊張過你啦。
講到尾，這宗交易是長建需要電能，多過電能需要長建。如長建有心想成事，那就堂堂正正以合理價格來收購，毋須再變出N種計算方法去扮單刁「好抵」。
海迪