馬會喺去年一月，重推停辦多年嘅四重彩後，10月25日又有新玩法推出，就係叫「組合獨贏」喇。
大家都知道，賭波可以買「入球大細」或「入球單雙」，唔使限死買邊隊贏定輸。「組合獨贏」亦都異曲同工，玩法方面有幾種，包括場場都會受注嘅「三揀一」，馬會會將每場參戰馬分成三組，分別係兩匹隔晚熱門馬，對三匹半熱門馬，以及其他冷門馬，馬迷從中揀一組落注。
另一種「組合獨贏」玩法叫「勝出練馬師」，如某場大賽得幾個練馬師派馬參戰，假設大摩出四隻、告東尼出三隻、蔡約翰出三隻，以及其他馬房馬匹，大家可從上述四個組合中揀一個，如果揀「其他」，只要非大摩、告東尼、蔡約翰的馬勝出，馬迷就中彩。
此外，又有「勝出地區」玩法，例如一場國際賽，參戰馬匹中，投注人士可揀香港隊、澳洲隊、日本隊或「其他」隊伍的馬匹落注。
講咗咁耐，大家對「組合獨贏」上述三種玩法有冇興趣呢？要留意嘅係「組合獨贏」係浮動彩池，唔同「足智彩」嘅固定賠率。假設於「勝出練馬師」中投注告東尼，落注嗰陣係三倍，跑完就算真係開出告東尼嘅馬，馬迷嘅回報賠率卻可能高於或低於3倍。